Фэйт Обилор: «Жақын арада Қазақстанға оралатын шығармын»
Қорғаушы «Тараздың» өткен маусымдағы ең үздік ойыншысы атанған еді.
«Тараздың» нигериялық қорғаушысы Фэйт Обилор клубтың баспасөз қызметіне берген сұхбатында маусымды қорытындылап, жамбылдық клубқа қайта оралу мүмкіндігі туралы айтты.
– Спорт басылымының нұсқасы бойынша команданың үздік ойыншысы деп танылуыңызбен құттықтаймын.
– Рахмет, бұл үшін өте қуаныштымын және маған сенген жандарға алғысымды білдіремін. Бұл ретте біздің команданың ойынына бірнеше ойыншылар өз әсерін тигізді деп ойлаймын.
– «Тараз» клубындағы өміріңіз қалай өтті?
– Мен «Таразда» өте жақсы уақыт өткіздім, маған айналамдағы адамдар мен керемет атмосфераны құрған жанкүйерлер ұнады.
– Клубтағы жағдай көңіліңізден шықты ма?
– Жалпы, бәрі жақсы. «Тараз» клуб ретінде өз көрсеткішін жақсартты, өйткені өткен маусымның басында біз қарапайым клубтың турнирлік кестенің басында тұра алатынын дәлелдедік.
– Кейбір инсайдерлер сізді клуб басшыларының өтірігі үшін және жалақыны төлемегені үшін «Тараздан» кетті деп жатыр? Клубтан кетуіңіздің нақты себептері қандай?
– Мен Нигерияда өмір сүретін отбасыма келдім, өйткені «Таразбен» келісім-шартым бір жылға ғана жасалған еді. Клуб басшылығы мәселе туындаған кезде бізбен ашық сөйлесті. Ешкім өтірік айтпайды, бізде тараптардың қол қойған нақты келісім-шарты бар.
– «Таразбен» келісім-шартыңыз аяқталды. Сіз мансабыңызды қай жерде жалғастырғыңыз келеді және қандай ұсыныстар түсіп жатыр?
– Шынымды айтсам, қазір сәл демалғым келеді. Бірақ жақын арада барлық ұсыныстарды сараптап, ең жақсысын таңдайтын боламыз.
– Мансабыңызды «Таразда» жалғастыру мүмкіндігі бар ма?
– Әрине. Клуб басшылығы маған жақсы ұсыныс жасаса, жақын арада Қазақстанға оралатын шығармын.
